Tura Diocese ni bilsi 50 ong·aniko manianiko da·alo Tura Sacred Heart Shrine gilja noko oprakaniko dake a·bachengatangaha. Ia salko Figlie di Maria Ausiliatrice (FMA) Sister Marcellina S. Sangma, Jubilee ko maniani miksonganiko agane, bi·anichi a·bachengdilaha. Oprakani somoio dakna nangananirangko matchote Catholic toromni dilgipa Tura ni Bishop Rev. Andrew R. Marak gilja ko ka·dilangaha.
Tura Diocese ni Golden Jubilee manianiko da·al saloni a·bachengate November 5 tariko chong·motan Robibar salo matchotatgen. Ia salo Chief Minister Conrad Sangma aro Garo Hills ni gipin dilgiparang bakko ra·angna ka·dongsoenga. Manianiona bang·a parish rangoni chadamberang, ma·gipa pagiparang, toromko dilgipa Father, Sister aro Bishop rang re·bae dakdilangaha.
Jubilee ko maniani bon·kamgipa salo, Tura Don Bosco Higher Secondary School kal·chakramo Northeast India Bishops’ Council ni Chairman Rev. John Moolachira rongtalgipa Missa Boliko on·anggen. Una agreba adita toromna aro manderangna dangdike on·giparangko dingtang mancha mande ra·anikoba dakanggen.
