Meghalaya NPP ni gitcham President aro Rajya Sabha ni MP Dr. WR Kharlukhi, re∙baenggipa Lok Sabha pu·onanio Shillong MP ni biapna NPP nigita susaataniko dake Congress dolni kosako chegipa ong·na ka·dongsoaniko parakangaha. Kharlukhi ni agananigitade, Voice of People’s Party (VPP) re∙baenggipa 2024 ni MP aro Autonomous District Council (ADC) o susanagita tarisogenchimoba uamang gitalgipa party ong∙ani gimin niangkuna nanggen ine janapangaha. Ia kattarangko agananichi darang partyko galone agana ong·ja maina VPP o sak 4 MLA rang gnang, NPP pilak partyko apsan ong∙e ra∙a aro iani gitasa pilak election-na tarisamsoaniko dakronga ine Kharlukhi aganangaha.
VPP ni sak 4 MLA rangko man∙genchimoba ian skanggipa changnasa ong∙aia aro uamangni bilakaniko 2024 MDC aro MP election o u·inagita man∙anggen ine ua aganangaha. NPP gipin party rangoniko susaatnagita candidate rangko rimnapaniko dakenga ine Shillong ni MP Vincent Pala ni agangipa kattani bidingo sing·aniko dakon, politics-ode napbagipako aro ong∙katnagipako champengnagita man·ja ine Kharlukhi aganchakaniko dakangskaaha. Khasi ku∙sikko Eight Schedule o napatna gita NPP kattasan gam·aia ine Pala ni matnangani bidingo CM Conrad Sangma ni dilanichi Assembly-o ra·chakangaha aro iako batanggimin somoio darang sorkarian kamko ka·kuja ine Kharlukhi aganangaha. Unbaksana a∙dokni ku∙sikrangko Eight Schedule o napatnagita MP Agatha K. Sangma, MP Pala aro ua an·tangan Parliament o bang·en ku∙rangrangko on∙aha ineba Kharlukhi agandapangaha.
