Meghalaya a·dokni ASHA kam ka·giparang uamangni man·gnirangko baridapatna dabianiko sorkarini knachakjaengani gimin kamtangtangona re·anggija noko dongtoke jingjengatna tik ka·angaha.
Meghalaya ASHA Workers’ Union (MASHAWU) ni dilanichi ASHA dolrang ia ja·kuko de·angenga jekon re·anggipa October 30 oni a·bachenge November 6 tarikona jingjengatna miksongangaha. Uamangni salanti kam ka·anio neng·nikanirangko janapna Sombar salo ASHA kam ka·giparang Health Minister Ampareen Lyngdoh ko grongaha. Indake ong·genchimoba uamangni dabienggiparangko chu·sokatna sorkari ra·chakna man·kujaengani a·selo ASHA kam ka·giparang kam oni neng·take jingjengataniko dakangkuna tik ka·angskaenga ine parakataha.
