Turani wilwilao donggipa gittimrango garirangko cha∙uanirang salsabatbat bariroroaniko koborrango parakataniko knasona man∙enga. Re·anggipa October 29 tarikni walo Te∙tengkol Circuit house ramao gari neng∙takchakram biapo donggipa garini chakka rongsako ma·sina man·gijagipa manderang cha·uangaha ine koborna parakataha. Ua gittimni wilwilao donggipa manderangni agananigitade ia biapo batanggimin somoirangoba bike rangniko petrol cha·uarangba bang·en dongaha ine u·iataha.
Ia ramao street light rang teng·jani a·sel an·dalgipa biap ong·ani gimin bang·a somoirangon cha·uanirangko niknagita man·ronga ine parakataha. Unbaksana ua biapko pulis dolrangni nirok simsakanirang komiani giminba skatang dake rogiparangni a·dam ong·angenga ineba u·iatjolangaha.
Ua ramao street light rang donggenchimoba batanggimin puja maniani somoio mangmangsan MeECL department lightrangko teng·ate on·a ineba aganangaha. Ia biap damsa an·dalgipa ong·e cha·ugipa aro skatang rogiparangna dongtogipa biap ong·engani gimin light rangko teng·ate on·chinagitaba MeECL departmentko mol·molaniko dakangaha.
Apsandaken Tura Babupara oniko Auto bolsani gari chakkakoba oke cha·uangaha ine koborna parakataha. Una agreba batanggimin salrangoba adita dingtang dingtang biaprangoniko jekai Civil Hospital ka∙mao gari donchakgipa biaponikoba gari chakkarangko aro garini petrol rangko chu∙anirangko u∙iatanirangkoba bang·en knasona man∙aha. Indakgipa obostarangoniko champengsona gita songdongenggipa manderang walo nirokenggipa pulis dolrangni raka ja∙kuko de∙china didian baksana ramarango light rangko teng∙ate on∙china jako ra·e kam ka∙enggipa dolrangko mol∙molaniko dakangaha.
