NEHU Tura campus o bida pakwatani, chatro chatrirangni naljokani aro jatsa jatgipin baksa meli nangrime donganiko Headquarter NEHU Shillong dakna nanggni kamrangko simsakgija galchange donenganina Turani saksa Social Activist Cherian Momin seachi janapataha. NEHU Shillongoni Anti-Ragging ba kragija kal∙ak on∙chepaniko champengani kamrangko NEHU Tura campus ni Director aro HOD rangna maming u∙iataniko dakujaenga. Iani bidingo agangolpogrikanirang bang∙bea jean Student Welfare ni Dean oniba nanggipa kattarangko university o chanchirimanirang chu∙ongjaenga ine Momin parakataha. Indake nichangani a∙selo re∙anggipa October 8 tariko MBA, Agri Business Management Department ni chatro saksa kal∙ak on∙chepako man∙gipaoni ong∙aha aro ia mamlarangko niate ta∙rakbee kamrangko ja∙ku de∙na nangenga ine Momin parakataha. Indakgipa kragija kamrang NEHU na kratchaaniko ra∙baa aro nambata ja∙kuko de∙na ku∙mongna nanganiko didiata.
2019 bilsini May 8 tariko Supreme Courtni ge∙etatgimino aro 2009 bilsio UGC ni kragija kal∙ak on∙chepani bidingo niamrangko tarigimino pangchake NEHU kamrangko ka∙angenga. Anti-ragging Committee aro gipin dolrangko songe on∙manahaoba baditana kingking kamko ka∙manchaenga uko sing∙dona nangani dongkuenga ine Momin parakangaha. Ia nanganirangko departmentprakon cholrangko am∙e an∙tangtangni gadango gisiko nange kamrangko ka∙na nanga. Gital napgipa chatro chatrirangna ‘Teacher Mentor’ ko songe on∙ani chanchigiminrangoni mingsa ja∙ku de∙ani ong∙a. Pilak chatro chatrirangna naljokaniko on∙a, simsakna aro poraichakram biapo dakchakaniko on∙a skigiparangna daitoko pakwataha.
University ni programrangko jekai Fresher’s meet aro gipin program rangko skigiparangni nirokanio simsakanio ong∙atna nanga. Indake dakanichi chatro chatrirangna naljokaniko on∙anisan ong∙aigija namgipa rimchaksoaniko on∙a amgen ine Momin parakataha. Campusni ning∙o kal∙ak on∙chepanirangko gimaatna ‘Departmental Anti-ragging Cell’ ko bikotna chanchirimangaha. Iako HOD ni jakchi dile, pilak skigipa, research scholar aro gitcham chatro chatrirang bakko ra∙e kragija kamrangko niroke ka∙angna tik ka∙aha.
Indake dakanichi NEHU Tura galchanganiko man∙a aro nanggipa agangolpogrikarangko chong∙motan Joint Action Committee (JAC), NEHUTA, NEHUNSA aro NEHUSU Shillong baksa chanchirimanirangko u∙ina ja∙manchakaniko man∙ronga ine Momin parakangaha. NEHU Tura bakrimaniko man∙a re∙mikkanganio knachakgijagipa nachilrangona ga∙akjachina ine Momin janapangaha. Sakanti chatro chatrirang uamangni dal∙roroanina namgipa poraichakgipa a∙damko nanga, galchipgipa aro kragija dakaniko nangja. Iako NEHU name niroke kam ka∙e naljokgipa aro tom∙tomgipa bidani nok ong∙atna ja∙kuko de∙na nanga ine Momin aganangaha.
