October 29 tariko Jengjaloni Tura songjinmaona re∙gipa National Highway ramao chu peke gisik u∙igija salgipa mande sakgniko pulis dolrang rim∙aha. Learning Sanctuary skulni Headmaster, Tyrone D’Brass apsan ramako re∙ange uamangko nike gipin gari salgiparang baksa a∙sel ong∙gniko niksamsoe Tura pulis station na koborko on∙ataha. Koborko man∙soa bakan Turaoni kilometre 30 mango chel∙ao donggipa Jengjal police station-oni pulis dolrang re∙ange nirokeaniko dakangskaaha.
Gariko dongdipate nion ua gariko chalaienggipa mande aro unbaksa gadopagipa bilongbeen chu pekaha ine ma∙sina gita man∙aha. Rim∙a man∙gipa chadambe sakgni mobile tower rangko tarianio kam ka∙giparang ong∙a. A∙sel ong∙aniko champengna dakchake pulis dolrangna kobor on∙e namgipa kamko ka∙ahanina skul Principal ko West Garo Hills a∙jani Superintendent of Police Abraham T. Sangma mittelpilani kattarangko aganangaha.
