Rongram oni Phulbariona tarigipa ramako matchotgija aro gipin kamrangko chu·onggija tariani gimin nokma sakgittam chong·motan Tebronggre (Dogrik Asimgre Aking), Tebronggre Aking aro Waramgre (Waram Songma Aking) bakrime Chief Minister Conrad Sangmana chitti sedoangaha. Ia sorokko bilsi gittamna skang B.R.C company jako ra·e kam ka·enga jekon da·o galchipanichi salantio re·ruraenggiparangna, mongsongbate Tebronggre aro wilwalao donggipa songrangna ramako matchotgija tarianichi neng·nikaniko on·enga ine parakataha.
Andok chiringko kadogipa pakmako bilsi 2 na galchipe donenga jekon 30 percent mangnigitasan kamko matchotkuenga ine uamang parakataha. Bol wa·arangko den·peanichi ramarangko apchonata aro re·rurana neng·nikanikoba on·enga ine uamang janapatjolaha. Tebronggre L.P skul sepango kadogipa pakmakoba apsandaken bilsi gnina galchipe donenga ine u·iatangaha. Una agreba Rongpel oni Tebronggre ona tarigimin ramako samtangtango a·a name gatdogija aro nala donggija tariaha ine parakataha. Tebronggre L.P skul aro Bishop Marengo English skulni sepango rumble strip ko bi·sarangni naljokanina tarie on·chinaba didianiko dakangaha.
P.W.D ramaoni Tebronggre gilja nokona tarianggipa ramako ma·chotmanahaoba bilsi 6 ba 7 na GHADC tangkarangko gamkuja ine u·iatangaha. Ia kamko giljani dilgiparang aro songni manderang melie ka·ahani gimin uamangni tangkarangkoba ta·rake on·chinagita Nokmarang mol·molangjolaha. Songo songgipa Jio mobile towerko nirokgija donanichi jao sal 10 ba 15 rangsan jakkalna man·enga aro ia network namgijani bidingo re·anggipa somoirangoba songni manderang sing·doaniko dakangahachim ine parakangaha.
Minggipin kenbegnigipara, MEPDCL ni sringgipa silbudurangko bangbang donani ong·a jekon department silbudurangko wentipnagita ku·rachakgimin dongenchimoba tarie on·kuja ine parakangaha. Soil & Water Conservation Department ni Tebronggre Range Office ko bilsi 5 ba 6 na galchipe donanichi da·o buring bolgrim ong·aha aro iachi silbegipa chibol, rubber ge·ani aro baganko nosto ong·ataona sokaha ine parakataha. Ia officeko nirokna mande saksako rakkigipakoba ra·gale da·o chu·gimik galchipe donaha ine janapangaha.
Tebronggre aro wilwilao donggipa songrangni palo ia janapgimin kamrangko jako ra·gipa departmentrangko niate kam ka·pachina Nokmarang WGH Deputy Commissioner ni gita CM na chittiko sedoataha.
