Tura songjinmao ramasamrango salanti jabol galaniko nirokna, kragija jila kaani, chiring chibisikrangko mitchiatani, robranggipa achakrangko komiatna aro gipin chagrongenggipa a·selrangni bidingo kam ka·na adita ja·rikna nanggipa niam ba cholrangko WGH District Administration ra·baaha. DC baksa bang·a Development Committee rang tom·bimonge chanchirimani ja·mano Tura songjinmako rongtale rakkina ia ja·kuko de·angaha.
Jabolrangko kraa bewalo galna Tura Municipal Board ni gitko wate noktangtangoni gariona ra·bana didiatanichi da·o dingtanganiko nikenga. Gittim 116 oni 84 mang gittimrangde ia bewalko jakkale skatang jabolrangko galramramgija krae galaniko dakenga ine u·iataha. Dongkuenggipa gittimrangkoba bakrimatna jotton ka·angkuenga ineba parakangaha. Niamko pe·giparangna skanggipa chango gong 500 aro gittamgipao gong 5000 ko dai gamna tik ka·e donaha.
Songjinmao robranggipa achakrangna dongchakaniko tarina sorkarina janapmanaha. Unbaksana Veterinary department na achakrangko biming segate biji su·aniko aro nirok simsakaniko nambate dakchina ge·etmanaha ine TMB ni Chairman J D. Sangma parakangaha. Una agreba jolo kragija dake wak jilaniko champengna Development Committee rangko kam ka·na daitoko on·angaha. TMB uamangna janapataniko man·e chiringrangona jabol galataniko champengnagita bang∙a manderangna talatmanaha aro dongimin niamko manigija dakgenchimode raka ja·kuko de·anggen ineba parakangaha. Uasan ong·aigija chiringsamrango paikana a·kol kitaniko dontongatna aro rongtal an·talaniko ja·rikna nambata ja·kuko de·nagitaba chanchirimangaha.
