Rerapara block ni ning·o ong·gipa South West Garo Hills, Dorambok songo gitalgipa Health and Wellness Centre (HWC) ko da∙al salo Rangsakona ni MLA Subir M. Marak nokdonggae on∙angaha. Iako chane da·o chu·gimik dambonga HWC rangko SWGH a·jao 15 Finance Commission nigita ra·bae on·angaha. Ia program-ona a∙jani Additional DC Y W. Momin, Reraparani BDO A Ch. Momin, DMHO H. Barman, songni manderang aro adita sanna bannanio dangdike on·giparang bakko ra∙angaha. Ia gitalgipa HWC o Sub-Centre gita kamko ka·anggen jekon song dam dokni manderangna sanna bannaniko on·a jakkalanggen aro mongsongbate an∙o donggiparangna nirok simsakaniko on·e dakchakanggen. Ia sanchakramo sanna bannaniko daknagita doctor-koba office ni somoigita grongna man∙gen.
Ia HWC ko OPD aro Day Care Centre dake jakkalanggen jeon diabetes, cancer sabisi, tika su·ani aro an∙chirangko porikka ra∙aniko dakanggen. Una agreba gipin biapni u·i ma·sigiparang doctor-rangkoba gisepo rimbaaniko dakanggen ine parakataha. Uasan ong·aigija ia sanchakramko poly-clinic gitaba jakkalanggen aro chu∙ongagita samrangko donchakram Pharmacy ba donggen ine parakataha.
Mongsonggipa sokgipa MLA Subir M. Marak, ia sanchakramko jakkalchina manderangko didiangaha aro Garobadha jolo apsandakgipa HWC rangni nanganiko parakangaha. Garobadha PHC ko ia bilsi bon·angachipak Community Health Centre ona tang·doatna aro Damalgreo PHC ko ra·bae on·a jotton ka·anggen ine Marak aganangaha. Songni manderangni ambulance nangnikaniko janapengon ia bilsio December jani gisepon ra·bae on·a Marak ku·watangaha.
