Ministry of Home Affairs nigita A∙chikku ko ge 38 gipin ku∙sikrang baksa Eighth Schedule ni ning∙o napatjani bidingo Garo Baptist Convention (GBC) suk ong∙gijaniko parakataha. Batanggimin somoirango A∙chikku aro sea jotanirang namroroaniko niknagita man∙an baksa A·chikkuko agangipa manderangba Northeast-o sak 1.5 million mangnigita donga aro mongsongbate Meghalaya a∙dokni dam bonga a∙jarango niknagita man∙bata ine aganangaha. Unbaksana Meghalaya a∙doko songdonggipa manderangoni 33% mangnigita A∙chikkuko jakkalgipa gnang.
Skia poraiani gadangoba hajalni hajal chatro chatrirang A∙chikkuko ra∙e poraianiko dakenga, jekon Doctorate ni gadangona poraianikoba niknagita man∙enga. India Constitution ni Eighth Schedule ni ning∙o A∙chikkuko napatna ru∙uta somoirangonin dabianiko dakmanaha aro man∙a kragipaba ong∙a ine GBC aganangaha.
Re∙anggipa somoio Eighth Schedule na ra∙gatna am·gipa ku∙sikrangko nakatatanio A∙chikkuko galchanganina, ma∙mong sorkari aro a∙dok sorkariko iani bidingo ta·raken nipiltaie A∙chikkukoba apsan daken bak ong∙atnagita GBC mol∙molaniko dakangaha.
