East Garo Hills a·jao bijolirang sokkugijagipa ning·tugipa dambri songrangona Global Himalayan Expedition dolrang, salni teng·aoniko bijoliko jakkalna man·agita bosturangko nokdangantina tarie on∙angaha. Mikkangchi aro bang∙bata nokdangrangna salni bijoliko tarie on∙angkuna miksongangenga ine a·jani DC parakataha.
Global Himalayan Expedition dolrang bijoli sokkugijagipa songrangna salni teng·aoniko bijoliko jakkalna man·agita Corporate Social Responsibility (CSR) ba company rangni songadam nokadamni namgnina on·gilaniko dake kam ka·ani ong·a.
Ia solar panel rangko suale tarie on·anio songni manderang gisiko nangbee jakko on·e kamko ka·angaha. Mikkangchi ia namgipa ja·ku de·anio bang·a nokdangrangna bijoliko sokatna jotton ka·angkuna uamang miksonganikoba parakangaha.
