Mijal salni bako All Chada Chra United Association-ni tom∙bimonganiko Tura, Dakopgre SMELC building-o ong∙atangaha. A∙ja dambongani Chada maharini chrarangko chimonge ama nokdangko, mosa boningko, noa namchikko, dukni sukni somoio chel·chakgipa ong∙na ku∙monge chanchirimaniko dakangna miksonge ia tom∙bimonganiko ong·atangaha. Unbaksana chra skarangni dukni somoio nirok sandigrikna, Garo Hills gimikni jonga grirangko sandina, ku∙mongna aro dakmesokna, ja∙man ja∙wilo ja∙rike ama anoni nokdangko rikgipa chel·chakgipa ong∙china didianiko dakangna miksonganiba ong∙a. Ia Association “Ma∙ani Amo Donona Noni Mattangdikona, Ma∙na Chel∙chakna Nona An∙chakna” ingipa kattao pangchake chanchirimaniko dakangaha.
Ia Association-ni skanggipa tom∙bimonganiko East Garo Hills a∙jani Williamnagar Veteriney Vocational Centre-o ong∙atchengaha. Ia tom∙bimonganio dingtangmancha dilgiparangko President-na Arwish Chada Marak, Secretary-na Winstone Chada Marak, Accountant-na Wilsber Chada aro Treasurer-na Salgre Chadako seokangaha. Unbaksana Organising Secretary rangna Mobilson Chada, Tenjing Chada, Maljrang Chada, Nagrang Chada aro Leobirth Chada-ko seokangskaaha.
