Da∙al salo Meghalaya a∙dokni skanggipa Chief Minister Capt. Williamson Sangmani siani chang 33 gipa bilsiko Garo Hills ni dingtang dingtang biaprango gisik ra∙e maniangaha. South Garo Hills a∙jani Capt. Williamson Park Baghmara-o manianio a∙dokni Education Minister Rakkam A. Sangma, Deputy Commissioner Shivansh Awasthi, Superintendent of Police, a∙jani adita niksenggipa dilgiparang aro sianggipani ma∙drang maharirang bak ra∙e gisik ra∙aniko dakangaha.
Capt. Sangmani Meghalaya a∙dokko jakgitel ong∙atna rakbee kam ka∙anirangko gisik ra∙e aro uni a∙dokna ka∙sabee dangdike on∙aniko Rakkam Sangma aganangaha. Chatro chatrirang porikkao 10 ba chikkunggipa gadango chu∙sokgiparangna je College ba University o indin admission rangko ra∙nagita sorkari dakchakanggen ine parakangaha. Unbaksana kal·susaani gadango chadamberangko namdapatnagita Siju Mondal Gitok Playground o artificial turf kal∙chakramko riknagitaba Khelo India Scheme nigita tangka paisarangko chamataha ineba ia tom∙anio ua parakangaha.
Apsandaken Turaoba District Council nigita Capt. Williamson Sangmani bimangko tarigipa biapo pulrangko done gisik ra∙aniko dakangaha. Una agreba Garo Hills ni dingtang dingtang bakrangoba uni siani salko gisik ra∙aniko dakna dilgiparang bak ra∙e mande ra∙aniko dakangaha.
