October 26 oni 29 tarikona Kerala a∙doko Trivandrum ni Ponmudi Hills-o Asian Continental Championship gari salsuaanirangko ong∙atnasienggipao Meghalaya a∙dokni sakgittam cycle salsusagiparang seokako man·angaha. A·dokni palo susana seokako man·giparangara Apshai Griffith Niangti, Taitus Ch. Marak aro Anissa Dariti Lamare ong·a.
Haryana ni Panchkula-o a·songni gadango ong∙atgipa training camp o India dolna sak 10 cycle salsusagiparangko September jao seokanio Apshai aro Anissa seokako man∙angaha. Una agreba cycle salsuaataniko dakataie seokanioba Apshai gittam gipa biapko man·aha, Taitus bonga gipa biapko man·angaha aro Anissa me∙chik doloni gnigipa biapko man∙angskae Asian Continental Championship na seokako man·e bakko ra·e susanagita cholko man·angaha.
