Sauramandala Foundation nigita a∙dok sorkari, Pratham Storyweaver aro Educational Research department baksa nangrime gimaangenggipa ma·gitcham pagitchamrangni golporangni ki∙tap king dok ko October 20 tariko Shillong St. Anthony’s College-o oprake on∙angaha. Ia ki∙taprangko Meghalaya a∙dokni bi∙sarangna jatni daka rika bewalrango pangchake skie on∙aniko dakangna Sauramandala Foundation ni a∙bachengatenggipa The Forgotten Folklore Project na on∙gilpaaniko dakangaha.
Ia oprake on∙anio School Education aro Literacy ni Director Swapnil Tembe, Social Welfare Department ni Director Dr. Frederick A. Lamare, Zoology department ni dal∙batgipa, Internal Quality Assurance Cell, SAC ni Coordinator, aro English department ni Assistant Professor Jacob Shylla, RUSA aro Design Innovative Centre ni Coordinator dongpae bakko ra∙angaha. A∙dokni golpo agana sapgiparang, changa sapanio niksenggiparang aro Sauramandala Foundation ni ning∙o an∙tangtangko on∙kange kam ka∙enggiparangba ia tom∙anio dongpae bakko ra∙angaha.
Ia projectna dingtangmancha king 45 seokgimin ki∙taprangoniko skanggipa changna king dok ki∙taprangko oprake on∙angchengaha. Ia ki∙taprangoni kingprakan Meghalaya a∙dokni jatrangni daka rika bewalrang, gam jin rang aro jatni itihasrangni bidingo see rakkianiko on·aniba ong·a. Dingtangmancha ia ki∙taprangko Anganwadi aro Primary skulrango poraienggipa bi∙sarangna sokate Meghalaya ni ma∙manti gam jinrangni bidingo ma∙sie ra∙angchina aro bi∙sarangni u∙i ma∙sie dal∙roroanina dakchakaniko on∙a miksonge ia ki∙taprangko tariaha. Ia tom∙anio Sauramandala Foundation ko a∙bachengatgipa Nagakarthik MP, ia ki∙taprangko tariani miksonganirangko talate on∙angaha. Unbaksana The Forgotten Folklore project ni ning∙o Khasi, Jaintia, aro Garo jatni bidingo Anganwadi aro Primary school ni bi∙sarangna chu∙gimik king 45 ki∙taprangko tarina miksonganirangkoba janapangjolaha.
