Re∙anggipa October 16 tariko Naga Students’ Union Shillong (NSUS) aro NEHU Vice-Chancellor Prabha Shankar Shukla ni tom∙e chanchirimanio, a·selo ga·akgipa chatroni nokdangna minggittam lekkarangko sokatna ra∙chakgiminko on∙a jechakpiltaiani gimin NSUS dol kusi ong∙gijaniko parakataha. NSUS dolni agananigitade October 18 tariko Vice Chancellor baksa grongriktaianiko dakon badi ka∙gimin lekka kingsa official ong∙gipa lekka ong∙a aro jinmana parakna man∙gijagipa ong∙a ine Shukla uamangna aganchakaniko on∙aha ine parakataha. Badi ka∙gimin lekka bichit ko on∙a man∙gijani maming niamrang dongja aro VC ni iani bidingo neng∙nikaniko mesokani gimin uamang sing∙doaniko dakangskaaha.
Ia obostarangko niatgenchimode, a·selo ga·akgipa chatroni nokdangna Fact Finding Committee nigita lekka pancharangko sokataha ine koborrango niksogipara kakketgipa ong∙ja ine nikna man∙aha ine NSUS dol aganangaha. Unbaksana Shukla an∙tangan badi ka∙anga ingipa kattarangba tol∙gipasa ong∙a maina name dake sandianiko dakahaon badi ka∙chongmotgipaara NEHU Tura Campusni Director Prof. Sujata Gurudev sa ong∙a ine ma∙sina man∙aha ine uamang parakataha. Ian Shukla ni tol∙e ong∙gija ku∙mikchetaniba ong∙a aro dosi dakgiparangko kragipa sastiko on∙a nangnikgijani ong∙a ineba NSUS dol matnangataha.
Kal∙aka man∙gipa chatroni gisik an∙seng baljokanina University nigita maidakgipa dakchakaniko on∙anggen ine sing∙aniko dakon, “Nokdangni manderang aro chatro an∙tangan somoini kri ong∙anggipa obostaoni naljokna nanggen” ine VC uamangna aganchakangskaaha. Saksa VC ong∙e uni gisik nanggijaniko aro kal∙aka man∙gipa chatrona kakket bichalko ra∙bae on∙a sikgijaniko mesokgipa mande indita mingsinggipa University ko chalaina krachongmotja. Unbaksana ong∙anggipa obostani bidingo dosi dakgiparangko chel∙chake aro kakketko donnue kam ka∙aniko ra∙chakna man∙chongmotgijagipa ong∙a ineba uamang agandapangaha.
Ia a∙sel ong∙anggiminko name dake niatna man∙jagenchimode uni VC ong∙aniko sing∙doaniona sokanggen aro dongimin niamrango pangchake ja∙kurangko de∙anggen ine NSUS bon∙kame aganangaha.
