South West Garo Hills a·jani Rerapara C&RD Block ni ning·o ong·gipa Upper Damalgre o Lay By Market ba ramasamo donggipa bajar a·damo game cha·giparangna rike on·gipa dokanrangko da·al salni bako Rangsakona ni MLA Subir M. Marak oprake on·angaha. Ia oprake on·ani program ko Department of Agriculture & Farmers’ Welfare, Directorate of Horticulture chu·soke ong·atangaha.
Ia ramasamo donggipa bajaro ge 24 dokan nokrang baksana paikana gnanggipa ge·gni Community Hall rangko SPA 2013-2014 o Horticulture department na chamatgipa gong lakh 72.51 tangkarangchi DRDA nigita kamko ka·e matchotataha. Ia oprake on·ani somoio a·jani ADC Yoshima W. Momin, Rerapara Block ni BDO Armand Ch. Momin, Damalgre ni Nokma, line department ni official rang, Lay By Market ni member rang, Horticulture & Agriculture department ni official rang aro adita bajar ni manderang bakko ra·angaha.
Ia rike on·gimin nokrango game cha·giparang uamangni bosturangko donchake darang gipin badinggiparangna palna nanggija bree cha·giparangna an·tangtangni jaktangchi game man·gipa bosturangko joljol palnagita namgipa chol ong·gen ine Subir Marak aganangaha. Unbaksana ia nokrangko game cha·giparang jakkalna cholko man·engon ia nokrangko nirok simsakaniko dakchinaba Marak didiangaha.
Ia gitalgipa dokanrangara bajarko tang·doatanisan ong·aigija wilwilaoni game cha·gipa aro bree cha·gipa manderangna namen dakchakbeani ong·gen ine Marak agandapangaha. Una agreba Upper Damalgre o antiprako bajar cha·aniko ia gitalgipa biapona apjitbagenchimode, antio salsa bajar cha·anikosan dakaigija salantian bajar a·damgita jakkalchinagita Marak didiangaha.
