Garo Hills a∙jao damsa gamchatbegipa skie ra∙chakram biap Tura Don Bosco College, changsatai National Accreditation Academic Council (NAAC) nigita grade B ni gadangko man∙angaha. Re∙anggipa October 4 aro 5 tariko NAAC Bengaluru ni sakgittam nirokgiparang Chairman Dr. Ramachandra Mohan M, Prof. Harish Chondola, Member Co-ordinator aro Dr. Jyoti Patil re∙bae ia gadangko Don Bosco College na on∙angaha.
NAAC nigita skia poraiani a∙bako niangan baksana chu∙gimik tang∙doani aro chu∙sokaniko nigrike collegena ia gadangko on∙angaha. Batanggimin changoba Don Bosco College, Tura apsan gadangkon man∙aha. Ia college 1987 bilsio a∙bachenge da∙o chu∙gimik bilsi 36 na kingking Garo Hills ni manderangna dangdike on∙angan baksa chatro chatrirangna namgipa skie on∙ani gadangko ra∙banna gita rakbee kamrangko ka∙angenga.
