Garo Hills o gnigipa changna Me∙gong Festival ko re∙baenggipa December jani 7 oni 9 tarikona Meghalaya Tourism nigita ong∙atna miksongenga. Ia festival na dingtang mancha Garo Hills ni mingsing minggamgipa aro dokna damna changgipa Nokpante dolrangni tarisamsogipa “Me∙gong Bibal” git ko mijal attamo Tura District Auditoriumo Chief Minister Conrad Sangma ni jakchi oprake on∙angaha.
Ku∙rongdik nigita Nokpante dolni Mikhail Marak baksa golporimaniko dakon ua gitni miksonganiko aro ja∙pangrangko agantalate on∙angaha. Meghalaya Tourism nigita Me∙gong Festival na dingtang mancha gitko tarie on∙chinagita Nokpante dol mol∙molaniko man∙e “Me∙gong Bibal” gitna tarisamsoanirangko a∙bachengataha ine Marak parakataha.
Me∙gong bibal balgaoani miksongani aro A∙chikrangni bebe ra∙anirangko am∙sandie ia gitko chinga tarina a∙bachengataha. An∙chingo ia October aro November jaonin adita manianirang aro an·saogipa somoirang jekai Wangala o ge·a gamanio pattianina Nokgipako mittelpilskaanirangko dakna manironga. Unbaksana ia kario aro Me∙gong bibalni balgaomiting somoio an∙ching A∙chikrangni mongsongbatgipa an∙sengani ong∙a jeon songo noko walgimikrang dama doke chrokanirang aro walsenge roanirangko an∙tangtangan chagronge ua somoirangko chanchiatpile niaton damben salrangko gisik ra∙atpile kusiniko man∙a. Me∙gong bibal an∙chingna kusini, an∙sengani balwa aro gital karini sokbaaniko katchae nichaksoani ja∙pango pangchake ia gitko tariaha ine Mikhail Marak talatangaha.
Ia maniani dingtang mancha Me∙gong bibalni balgaoaniko aro a·rankari sokani sakkiko on∙gipa ong∙an baksana an∙senganiko dakmesokgipa ong∙a. Manianiona re∙bagipa sakantikon an∙sengan baksana simsakgiparang ong∙chinaba didiangaha jedakode an∙tangnasan naljokaniko ra∙baaigija sakgipinaba a∙selko on∙jawa ine Marak agandapangaha. Ia dal∙begipa manianiko jinma ku∙cholsan ong∙e kusi ong∙e an∙senge matchotatna aro gital bilsiko nisengsona ua manderangko didiangaha.
