Williamnagar Eastern Zone Garo Student Union (GSU) ni pu∙onani salko uamangni gisepo adita neng∙nikanirangko chagrongani a∙sel dongimin tarikko dingtangataha ine u∙iataha. Pu∙onani salko re∙baenggipa October 26 tarikona ra∙doatskaaha aro ja∙rikna nanggipa adita niamrangkoba taridapaha ine koborna u∙iataha.
Pu·onao susagrikna biming segataniko dakna October 14 tarikni pring 9 bajioni attam 4 bajiona donsoaha. Biming segatgiminrangko ra∙napna bon∙kamgipa sal October 16 tarikko donataha. Susaanio bak ra·nasienggiparangko name tale nipilaniko dakna October 17 tarikko donangaha aro bon∙kame pu·ona skang wenaniko dakna October ni 25 tarikko donsoaha, uni ja·mano maming kamkon ka·na man·jawa ine u∙iatangaha.
