October 8 tarik ni walo, Tura NEHU ona Agri Business Management ko poraina re·bagipa saksa chatroko Chasingre Arbella Boys Hostel o kragija dake kal·ake roanina Tura ni saksa Social Activist Cherian Momin jegalaniko dakataha. Indakgipa kragijagipa kamrangko ka·ahanina, kal·stekako man·gipa chatrona niamrango pangchake kakket bichalona ra·bachina aro ta·rake mokordoma ka·chinagita NEHU ni Vice Chancellor Prof. Prabha Shankar Shukla ko didiataha. Unbaksana a∙selo ga·akgipa chatroko dingtang Central University biapona apsan course ko daknagita apjitate on·chinaba mol·molataha.
Dosiko dakgipa chatrorangko university rango UGC ni dongimin Anti-ragging niamrango pangchake university oniko a·rikgalna nangasan ong·aigija poraichakram biaprangni bimingko name rakkina nanganikoba Momin janapataha. Indakgipa obostarang ong·ani gisepon, ragging ka·ani bidingo UGC ni dongimin niamrangko chugipa gadango poraichakram biaprango rakbate ja·rikna nanga jeon mongsongbate gital napgipa chatro chatrirangna simsakbatnagita nanga ine ua janapataha.
Indake niamko ja·rikgija kragijagipa kamrangko ka·aniara chatro chatrirangni gisepo kratcha·anikosan ra·baaigija bidako pakwatgipa a∙damrangnaba namgijagipa bimingrangko ra·baani ong·a ine Momin aganaha. Mikkangchi indakgipa kamrangko pilak poraichakram biaprango raken jegalna nanga ine Union ni President Chiran Shimrah ni suk ong·gija agananirangko gisiko chipe donna nanga ine Momin aganaha.
Ia a·sel ong·anina Director, niamrangko skie nirokgipa aro ua hostel ko nirokgiparangni simsakgijanina uamangni kosako kraa sastiko on·a nanga ba ra·galna nanga ine NEHU ni VC Prof. Prabha ko ja·ku de·china Momin janapataha.
Unbaksana Garo Hills ni gimik NGO rang ku·cholsan ong·e a·selo ga·akgipa chatrona kakket bichalko ra·bae on·china aro jako ra·e dilgiparang nirok simsakangna nanga ine Momin mol·molataha. Una agreba Shillong NEHU ko KSU rangni jako ra·e kam ka·agita, Tura NEHU oba GSU rang jako ra·e kamrangko nirok simsakna man·agita a·bachengatna nangengaha jedakode chatro chatrirangna dingtang dingtang a·sel ong·aoniko naljokatna aro bakrimaniko chu·sokatnagita man·gen ine Momin janapataha.
