Mijal salni bako bilgribegipa butchuma saksa Dobu songoni km 30 mang chel∙beako Williamnagar SBI bank ona an∙tangni pension ni man∙gni tangkarangko okna re∙baaniko nikna man∙angaha.
Social mediao giproroenggipa A∙chik Progressive Approach (APA) dolrangni gatatgipa jawilwatko nigenchimode ua butchuma namen bilgribeaha aro be∙en bimang til∙tile sakgipin mandeni rim∙chake on·anichisa chadengna pangchakgipa ong∙a. Bank ona re∙ange uni tangkarangko okna ine sandion uko soi ka∙gijade tangkarangko okna man∙jawa ine bank ni manderang janapataha ine ua agnangaha. Soiko ka∙na ua butchumani jakrang til∙tile namen bilgribeaha aro maming cholchiba soi ka∙na man∙gijaniko niknagitaba man∙aha.
APA dolrang ia kamko ra∙chakna man∙jae, bank oni manderang bilgrigipa butchuma aro budeparangni man∙gni tangkarangko maina sokatna man∙ja ine sing∙doaniko dakangaha. Unbaksana East Garo Hills ni DC aro Williamnagar SBI ko iani bidingo raka ja∙kuko de∙e bilgrigipa butchuma aro budeparangna bank o ka∙giparang dingtang dingtangcholrangchi tangkarangko oke on∙e uamangona sokatchinagita mol∙molataha.
Garo Hills o bang∙bata bank rango namrenga gnang, ka∙saninggija aro rakgipa kattarangchi manderangko inaniko an∙ching nikronga, mongsongbate SBI bank rango ia obostarangko chagrongbata.
