A·dok sorkari nanggitiko jakkalna 108 service ko gital dake jako ra·e kamrangko ka·na pakwate on·agita kamrangko matchotkujaengani gimim kamko chu·sokatnagita antignina bate nangkugen ine Health Minister Ampareen Lyngdoh mijal salni bako parakataha. Iani bidingo National Health Mission-ni Managing Director baksa agangrikaniko dake gital dake jako ra·e kamko ka·nasiengapa nakatatna gita kamrangko ka·angkuenga aro dakna nanggnigipa kamrangko matchotatna adita somoirangko nangnaba donga ine Ampareen Lyngdoh koborna parakataha.
Nanggitiko jakkalgipa 108 service ko GVK Emergency Management and Research Institute baksa nangrime kam ka·aniko dontongatani ja·mano jako ra·e kam ka∙nagita gital dolna pakwatna ku∙chakaniko a·dok sorkari janapangaha.
108 service o kam ka·giparang Health Minister ko gronge uamangni kamrango jajrengani bidingo golporimangaha. Meghalaya sorkari gital companyrang jako ra∙e kam ka·genchimoba niamo pangchake 108 o kam ka·giparangna chel·chakaniko on∙an baksana kam ka·giparangni neng∙nikanirangko naljokatnagita dakchakna ku∙chakangaha. Je company-an jako ra·na chu·sokgipa ong·gen uan a·dokni manderangko sanna bannanio simsak nirokangnagita name kamko ka∙angskagen ine Ampareen Lyngdoh ka·dongatani kattarangko agandapangaha.
