Gitcham CEM Agustine R. Marak aro retired Principal Secretary Hewingson A. Sangma ko tangka jakkalsreta ine dosi on·e Meghalaya Lokayukta o rai on·aniko jegale Meghalaya High Court o mokordoma ka·doskaaniko uamang ra·galpilaha ine koborna parakataha.
Battanggimin chango GHADC ni CEM, Deputy CEM, EM aro MDC rang jean Agustine R. Marak, Denang T. Sangma, Brillaint R. Sangma, Dipul R. Marak, Kurosh R. Marak, Winninson Ch. Marak, Dolly K. Sangma, Bhupen Hajong, Sukaram K. Sangma, MLA Sanjay A. Sangma, contractor Dolrich Sangma aro retired Principal Secretary Hewingson A. Sangma, ni kosako ma·mong sorkarioni Tura member hostel nokko aro court nokko rikna chamatgipa tangka paisarangko jakkalsretaha ine am·sandianiko dakani ja∙mano Meghalaya Lokayukta o rai on∙aha.
Niti Aayog ni gita Garo Hills Autonomous District Council ko namdapatna 2015-2016 bilsirango tangka gong 100 crore lakh 71 ko chamatgipaoniko gong crore 6 lakh 1 hajal 31 ko Sanjay A. Sangma na, Turao member hostelko rikna aro gong crore 3 lakh 52 ko contractor Dolrich Sangma na Turani Court nokko rikna chamataha ine u·iataha.
Ia nokrangko matchote rikna uamang na bilsi gni na somoiko on·mangenchimoba, nokrangko rikani da·alona matchotkujaengani gimin saksa social activist Kingstone Bolwari, uamangni kosako Meghalaya Lokayukta Act 2014 o badi ka∙doanio dosi donga ine raiko on∙aha.
