Da∙al salni bako a∙dokni Chief Minister Conrad Sangma, Rongjeng Stadium ko rikani kamrangko a·bachengatna pangchakani krongko songe on∙angaha. Ia programona CM baksa Sports Minister Shakliar Warjri, MLA Jim Sangma aro Rupert Momin dongpae bakko ra∙angaha. Rongjeng Stadium ko rikna gita tangka gong 9.25 crore ko chamataha jeon football kalchakramko taridapan baksana nigiparangna asongchakramkoba tarianggen.
Rongjeng Civil Sub-Division ko tariani aro jolo rika cho∙ani kamrango tang∙doenganiko nikanian PA Sangma sagini Rongjeng na dingtanganiko ra∙bana niksamsogipani sakkiko mesoka ine Conrad Sangma aganangaha. Kal∙chakram biaprangko rikna 2018 bilsioni a∙bachengate, sorkari chu∙gimik tangka gong 400 crore na bate jakkalaha ine Sangma parakangaha. Re∙baenggipa bilsi bongani gisepo a∙doko kal∙chakram biaprangko rikna sorkari tangka 1000 crore ko jakkalna miksonganikoba Sangma parakangaha.
