West Garo Hills a·jao banggriani somoio dakna nanggni kamrangni bidingo daksninge mesokaniko Meghalaya State Disaster Management Authority (MSDMA), District Disaster Management Authority, West Garo Hills Revenue department aro Disaster Management Department, National Disaster Management Authority (NDMA) baksa bakrime da·al salni bako Tura o ong·atangaha. Ia daksninge mesokaniko a·jani D.C. Office, Maternity and Child Hospital, Tura Super Market, Tura Govt. Girls Higher Secondary School, Gonga Damal aro Rishipara gittimrango ong·atangaha.
Ia daksninge mesokaniko mikkangchi bilakgipa banggrianiko chagrongani somoio dakna nanggni kamrangni bidingo skie on·aniko dakangaha. Chengo 1897 bilsio 8.7 magnitude mang ong·e dal·gipa banggriani somoio ong∙gipa obostarango pangchake aro chanchichipe daksninge mesokan baksana banggria ta·rakani kri nanggipa ja·ku de·anirangkoba daksningangaha. Unbaksana indakgipa rang∙gitik obostarang ong∙ani somoio dilgiparang aro dangdike on·giparang kan·dikbegipa somoio manderangna dakchakniko sokatna man·ani bidingoba talate on·angaha.
Indakgipa u·isona amgijagipa obostarangna an·ching salni bakosan ong·aigija waloba simsake dongnagita nanga maina walo obosta ong·anirang salo obosta ong·gipana bate neng·nikaniko on·rongbata ineba DC aganangaha. Indake daksninganirangko mikkang changrangoba banggriani aro nokrangko wa·al kamani bidingo dakanggen jedakode an·chingni a·jani manderang indakgipa obostarangko chagrongani somoio kragipa ja·ku de·anirangko dakangna mikrake donggen ine District Disaster Management Authority ni palo WGH a·jani DC ku·rongdikna parakataha.
Apsan daken banggriani somoio dakna nanggni kamrangni bidingo Garo Hills ni gipin a·jarangoba daksninge mesokangaha.
