Meghalaya a·doko maikai Renewable Energy ni bak gita salni teng·aoniko bijoliko bikote a·doko jakkalna man·a gita mijal salni bakko a·dokni Power Minister, Union Power Ministry baksa tom∙e chanchirimaniko dakangaha ine MeECL ni Chairman cum Managing Director Sanjay Goyal parakataha. Ia tom∙anio Power Minister a∙doko solar power ko jakkalanichi bang∙a namgnirangni gimin Union Power Minister na agan talataniko dakangaha.
Ia tom·anio gipin bijoliko bikotanirangosan pangchakaigija salni teng·aoniko jakkale bijoliko bikotani namgnini bidingo chanchirimangaha aro a·doko mega solar plant bikotna biaprang chu∙ongagita donganikoba janapangjolaha. Re∙anggimin somoio MeECL ni adita a·arangko Solar Power ko bikotna gita on∙anikoba dakangaha, indiba tender on∙ako darangba ra∙giparang donggijaniko aro gisik nanggijaniko nikangnagita man∙aha. Uandake a∙doko solar power ko bikotnagita ma∙mong sorkari baksa bak ong∙enggipa National Thermal Power Corporation (NTPC) baksa kam ka∙na miksonganikoba janapangjolaha aro Union Power Minister ra∙chakaniko dake Public Sector Unit dolko biaprangko ni∙echinagita ge∙etaniko dakangaha ine Goyal parakataha.
Union Minister Umiam dam o solar plant aro solar power ko bikotnagita chanchianikoba ra·chakangaha aro NEEPCO company iarangko ta·rake jako ra·e kam ka·angchinagita Union Power Minister ge·etaniko ong·angaha ine Goyal u·iatangaha.
