Williamnagar Eastern Zone Garo Students Union (GSU), 2023 bilsini pu∙onani salko man∙china mijal attamni bako Chief Election Commissioner Semion Sangma ni sa·rao EGH a∙jani Election Commisioner rang tom·bimonge chanchirimangaha.
EC rangni tom·e chanchirimanio October 19 tarikko Eastern Zone GSU ni pu·onani salna tik ka·angaha. Ia pu·onani salna skang ka·na nanggni kamrangni tarikrangara, October 12 o nomination file ka·ani ong·gen aro nomination ko ra·galpilnagita 13 tariko dontongatgen. Una agreba pu·onanio susanasienggiparang 16 aro 17 tarikrangosan biaprangchi wenaniko dake je kamkoba ka∙na man·gen ine u·iatangaha. October 18 tarik pringni 5 bajioni a·bachenge pu∙ona matchotaona mamingkon dakna man∙jawaha ine EC rang parakataha.
