Dadenggre Sub-Division ni ning∙o MTET porikkako pass ka∙e donggiparangko da∙alona kingkingba skigipani kamona rimnapjani gimin suk ong∙gijaniko parakataha. 2019 NCTE ni dongimin niamo pangchake sorkarini chalaienggipa LP aro UP skulrango skigipani kamko ka∙na Teachers Eligibility Test (TET) porikkako pass ka∙giparang ongna nanga ine Meghalaya Teachers Eligibility Test (MTET) porikkako seataha. Indake ong∙genchimoba Dadenggre Division ni ning∙o jemangan MTET ko pass ka∙manaha uamangko skanggipa chango pass ka∙giparangkon da∙alonaba kamna rimnapaniko dakujaenga ine matnange aganataha.
Gipin a∙jarangko niatgenchimode skanggipa chango pass ka∙giparangko skigipani kamna rimnapmane, gnigipa chango pass ka∙gipa skigiparangkoba rimnapna janapa dongaha ine Dadenggre Division ni MTET Association suk ong∙gijaniko parakataha. Dadenggre Division o 2019 aro 2021 bilsirango MTET pass ka∙giparangko kamona apsan rimnapdimna koborrangko on∙genchimoba adita gipin jatrang namnikjae mokordoma ka∙ani a∙selo rimnapaniko dontongataha. Ia ong∙gipa obostani ja∙mano da∙alona kingkingba maming u∙itaniko on∙kujaenga ineba uamang janapataha.
Dadenggre jolo donggipa sorkarini LP aro UP skulrango contractual o rakkigipa skigiparangko ra∙galani ja∙mano skigipani kamna rimnaptaianiko dakjani a∙selo skulrango chu∙ongagita skigiparang dongjae poraienggipa bi∙sarangna neng∙nikaniko on∙enga. Unbaksana gipin a∙jarango MTET porikkao chu∙sokgijagiparangko kamna rakkianiko dontongatgenchimoba Dadenggre Division o da∙alonaba uamangko kamna rakkikuenga ine parakataha. Kamrangko nirokgipa Department niamrangko apsan dake ja∙rike Dadenggre Division ni skulrango skigiparangko gipin biaprangogitan ta·rakkale rimnapaniko dakna nanga ine uamang mol∙molanikoba dakangaha.
