September 8 tarikni walo North Garo Hills a∙jani Kaldang jolo sakgni manderang mongma chadrapanichi saknaa man∙angaha. Assam sima ari aro Kaldang jolni jangchigriko mongma jinma walni somoio re∙angmitingo a∙selo ga∙akgipa me∙asa aro me∙chik sakgni apsan ramako re∙pakange ia obostako chagrongaha. A∙sel ong∙ani kobor rangko man∙soa bakan a∙jani police dolrang, wildlife department baksa a∙damona sokangaha ine NGH ni SP Bruno A. Sangma koborna parakataha.
Ia a∙dok damgnini sima ari jolo bilsiantian mongma jinma repakronganiko nikna man∙a, mongsongbate sin∙kario uamang manderangni songdonggipa biaprangona cha∙anirangko am∙na ong∙kataniko nikrongbata. Iani a∙selan mande aro mongmani chagronggrike a∙sel ong∙anirangko nikna man∙a. Batanggimin bilsirangoni Garo Hills o mongma baksa chagronge a∙sel ong∙aniko nikbaenga aro bang∙a manderangan janggitangko gimaataha.
Mongma aro mandeni nanggrikaniko champengnagita ge·sa NGO Aaranyak dolrang Garo Hills ni bang∙a bakrangona re∙ange kamrangko ka∙enga. Uamang dingtang mancha mande aro mongmani dongrimbae janggi tanganiko, unbaksana ia dal∙batsranggipa a∙ani jontuko chagrongan somoio naljoke dongna nangani cholrangkoba skie on∙angenga. Batanggimin salrango Aaranyak dolrang andalgipa biaprangko jatengate mongmaoni naljoke dongna man∙agita light rangkoba songdime on∙angaha.
