Williamnagar oni bilsi 12 ong∙gipa Sengsim Ch. Marak, Avai M. Marak aro bilsi 10 ong∙gipa Sillangbirth R. Marak sakgittam me∙a bi∙sarang East Garo Hills Swimming Association ni dakchakanichi chang 16 gipa State Aquatic Championship 2023 o bakko ra∙angaha. Ia susaataniko Meghalaya Swimming Association aro Directorate of Sports & Youth Affairs nangrime Shillong Nongmalki ni Crinoline swimming pool o ong∙atangaha.
Bak ra∙anggipa sakgittam bi∙sarangan chi jroanio nambata gadango changa sapaniko skia man∙kugijagiparang ong∙a. Ia chi jrosusaanio gipin changgipa sapgiparang baksa A·chik bi·sarangba susapae digini bakroa chu·gimikko tarakbate jroe matchotna man·ahaoba dongimin niamrangko ja·rikjani a∙selo uamang boksisrangko noktangona ra∙bana man∙jaha ine u·iataha. An·tangari changaigipa ia bi∙sarangna nambata gadango changa sapaniko skie on·gipa a·damrang dongode mikkangchi a∙dokna aro jatna mikkim rasongko ra∙bagiparang ong∙anggen. Unbaksana ia bi·sarangni on·kange jotton ka·aniko nike da·o nambata cholrangko on·jaode uamangni indakgipa dal·gipa susaanirango bak ra·aniara ong·gramaigipa ong·gen.
Garo Hills o chu∙ongagita sports ni a∙damo nanggipa skie ra∙ani cholrang dongjani a∙sel A∙chik bi∙sarang aro chadamberang an∙tangtangni changa sapanio mangmang pangchake susaanirango bakrangko ra∙nagita nangronga.
