A·dokni Social Welfare Department ni Minister Paul Lyngdoh aro Women & Child Development ni Union Minister Smriti Irani baksa chanchirimani ja∙mano ma∙mong sorkarini gita a∙doko gital dam 266 Anganwadi centre rangko songna aro hajal 1266 chonchongipa centre rangko dal∙dapatna ma·mong sorkarioni tangkarangko chamataha ine Lyngdoh koborna parakataha.
Centre rangko namdapatani ja∙mano dakchake on∙gipa saksani palo sakgni done uamangna hajirako baridapate aro gipin man∙gnirangko on∙e rakkina tik ka∙anganiko Lyngdoh janapangaha.
Anganwadi centre ni ning∙ao dangdike on∙gipa rangni hajira gong 3500 oni gong 4500 ko jaanti on∙a tik ka∙anikoba ua parakangaha. Iasan ong∙aigija centre ge∙prakona bilsio gong hajalsa damo uamangni ganding chindingko joraprak sokatna ra∙chakaniko ua parakangaha. Una agreba centre ge∙praknan sanna bannani bosturangko ra∙na bilsio gong 750 chamaoniko gong 1500 ona tang∙doate on∙a tik ka∙angaha.
Namdapatna chamgimin dam 1266 Anganwadi centre rangna sak 51 Lady Supervisor rangko seokanggen. Chu∙gimik namdapatna nanggipa tangka paisarang gong 826.38 lakh ong∙aoni ma∙mong sorkarini gong 743.74 lakh aro a∙dok sorkari gong 82.64 lakh tangkarangko chamaha ine Lyngdoh koborna parakataha.
