East Garo Hills, Williamnagar songjinma aro wilwilao donggipa skulni chatro chatrirangna extempore speech susaaniko District Administration ni Multi-purpose Hall o ong∙atangaha. Skulrangni gisepo susaataniko District Planning Investment aro Promotion and Sustainable Development Department dingtangmancha National Wildlife Week ko maniani bak gita ong∙atangaha.
Iako skulni chatro chatrirangna samtangtango dongenggipa buring bolgrim aro matburingrangko ripinge naljoke rakkianio gisiko nanggiparang ong∙china mikrakataniko on∙a miksonge ong∙atangaha. A∙jao gimaangenggipa aro bon∙angenggipa jonturangko chatro chatrirangna u∙iate on∙angan baksana uarangko naljokate rakkina jak o ra∙e kam ka∙china didianiko on∙angaha. Susaanio Williamnagar songjinmani niksenggipa bang∙a skulrang bak ra∙angaha jeon bon∙kamao chegipa ong∙giparangna boksis aro gamchatgipa upadi lekkarangkoba sualangaha.
