A·chikrangoni saksa Golf kal·na gisik nanggipa Tura Matchakolgre oni Rojinush R. Marak aro Promila G. Momin ni depante Johnwell G. Momin re·baenggipa November jao Goa-o ong·nasienggipa National Games 2023 o Meghalaya a·dokni palo kal·na seokako man·angaha. Uni golf kal·anio chugipa gadangona sokdoanganiara A·chik jatna mikkim rasongko ra·baani ong·a.
Johnwell Momin uni bilsi 14 ong·o Turani gitcham MLA Billykid Sangma ni kal·aniko nike daksningpana a·bachengaha ine parakataha. Batanggimin 2014 bilsio ua PGTI (Professional Golf Tour of India) Qualifying School o nape kal·angaha aro Shillongo ong·atgipa Chief Ministers Cup 2014 o bakko ra·angaha. Una agreba John dingtangdingtang state level o kal·susaanio chegipa saksa ong·angaha.
