Meghalaya Basketball Association (MBA), Garo Hills gimikni Basketball Association rang baksa me∙a aro me∙chik dolrangko kal∙susaate nambate kal∙giparangko Meghalaya Senior National Basketball dolo kal·nagita Tura o skanggipa seokaniko dakangaha.
Uamangni changa sapaniko porikka ra∙e nianiko Tura Don Bosco Higher Secondary Skul ni basketball kal·chakram biapo salni 1 bajio a·bachengate attam 5 baji mango matchotataha. Kal·susaaniona Garo Hills ni adita dingtang dingtang a·jarangni chadamberang sokbae an·tangtangni changa sapaniko mesoke nambee susagrike dakmesokangaha.
Me·asarangni gisepo nambate kal·giparangoniko Cheksrang R. Marak, Sundeepan G. Momin, Asim D. Marak, Rikrik K. Marak aro Trinson M. Sangma ko seokangaha. Apsan daken me·chik dolrangoniko Tengsilchi B. Marak, Bonatchi Ch. Marak, Aquisha K. Sangma, Sonaisa G. Momin aro Caneya D. Sangma ko seokangskaaha.
Garo Hills nigita seokako man∙giparang October 7 tarikoni Shillong St. Anthony’s School-o pring 10 bajimangoni kal∙susaaniko dakanggen. Ia kal∙susaanio nambate kal·giparangko seoke jagnina skie ra·nagita camp-o dongate, Punjab ni Ludhiana-o ong∙atnasienggipa Senior National Basketball tournament-o Meghalaya a∙dokni palo kal∙susaanio bakko ra·anggen.
