South Garo Hills a∙jani ning∙ao dingtang dingtang sorkarini scheme aro programrangko kam ka∙enggipani bidingo nambate kam ka∙angna man∙a gita mijal salni bako Baghmara Circuit House o tom∙e chanchirimaniko dakangaha. Ia tom∙e chanchirimanio Education Minister Rakkam Sangma mongsongbate poraia skiani gadangko nambatatna nangani bidingo aganangaha. Unbaksana a∙jao kam ka∙enggipa scheme rangko adita dingtangatanikoba dakanggen ine Sangma agandapangaha.
Promgramo bak ra∙gipa a∙jani Deputy Commissioner Shivansh Awasthi, Program Implementation & Monitoring Committee ni Co-chairman Satto Marak, BDO aro Minister an∙tangba schemerangko nambate ra∙gatanichi a∙jani tang∙doanina dakchakani ong∙gen ine janapangaha.
Skia porako nambatatna miksonge re∙mikanganio department-o neng·nikanirangko name see on·chinaba skulko nirokgiparangko didiangaha. District School Education Officer P M. Sangma ni una u∙iatanigita a·jao ge 282 primary skulrangoni 150 skul nokrangosan skianirangko dakna man·enga aro uarangoni bangki ge 86 skul nokrangkode taridapna nangenga ine chanchirimanio parakangaha. Ge 30 mangnigita skul nokrangko Education department ni tangkarangko chamatanichi matchotnagita man·aha ineba ua u·iatangaha. Chu·gimik poraia skiani gadango skulko nirokgiparangni kakketgipa u·iatanirangko sorkariona sokatjani a·selo skul nokrangko taridapna aro skigipa dongkugijagipa skulrangona chu∙ongagita sokatna man·jaenga ine Education Minister Rakkam Sangma parakangaha.
A·jani manderang sorkarini on·enggipa MGNREGA scheme ni namgnirangko man·a sikani donggenchimoba, bimingtangtangko aadhaar o segatna jechakaniko dakkuenga ine DRDA ni Project Director P R. Marak janape aganangaha. Indakgipa obostarang nabaengon block ge·antini BDO rangko neng·nikanirangko chagronggipa blockni bimingrangko see on·chinagita Minister didiangaha.
A·jao nosto ong·e dongenggipa ramako tarianiko re·baenggipa bilsini February ja na skang matchotatna nangenggipani bidingo Minister ni sing·aniko dakon, gong crore 6 tangka paisarangko ma·mong sorkari chamataha ine jako ra·e kamko ka·enggipa National Highway ni Executive Engineer aganangaha.
Una agreba Baghmara Civil Hospital ko chonchongipa rata koaniko dake sanna bannaniko on·a man·agita ru·utgija somoini gisepon tang·doatna am·engaha ine Hospital ni Superintendent Dr. Calvaryn Marak aganangaha. Ia kamrangko ka·na miksonggenchimoba adita neng·nikanirangko chagrongenggipako nirokatchengchina u·iatangaha. Ia chanchirimanio hospital o je neng·nikanirangko chagrongenga uarangko jako ra·e kamko ka·enggiparangko nirokatchinagitaba Rakkam Sangma didiangaha.
