Meghalaya Grassroot Music Project (MGMP) ni gnigipa season ko Shillong Khyndailad, Police Bajar-o mijal salni bako a∙dokni Chief Minister Conrad Sangma aro Tourism Minister Paul Lyngdoh ni dongpaanio oprake on∙angaha.
Programo aganengon, Chief Minister Conrand Sangma, MGMP ko skanggipa ong∙atanio chu∙sokanina iano bak donggiparangna katchapaaniko on∙angaha. Ia MGMP nigita bilsisani gisepon sak 1600 doka damani aro git ring∙anirango gisiko nanggipa a∙doktangni chadamberangna ge 3000 mangnigita dingtang dingtang manianirango uamangni changa sapaniko mesokna cholrangko on∙a man∙aha ine Sangma aganangaha. Iako ra∙baanichi chadamberangna tang∙donagita ga∙chatani a∙damkosan on∙aigija a∙dokni daka rika aro bewalkoba MGMP chi dakmesokna man∙ani chol ong∙a ine Sangma aganangaha.
MGMP ni gnigipa bakko dal∙bate ong∙atangna Chief Minister aganengon iachang doka dama aro ringsalnikosan dakaigija jat tangni gitcham kattarang, dakmesokani, chadenge ka∙dingatna aganani aro gipinrangkoba ong∙atanggen ine Sangma agandapangaha.
