A∙dokni manderangna dingtang dingtang a∙selrango ga∙akanio kakketgipa bichalrangko ra∙bae on∙a man∙agita Meghalaya a·dokni Human Rights and Anti-Corruption Youth Power of India-ni Working President Kingstone Bolwari, State Level Police Accountability Commission ko songe a·bachengatna didiangaha. Ia Commission ko Meghalaya Police Act, 2010 o pangchake ra∙gataniko dakna nanga ine ua u∙iatangaha.
Marak ni agananigitade Meghalaya sorkari ia Act ko re∙anggipa 2011 bilsini February 7 tarikonin a∙bachengatna rai on∙angaha jekon jagittam ni gisepon ra∙gatani ong∙achim ine parakangaha. Indake ong∙genchimoba ia Accountability Commission ko da∙ona kingkingba a∙bachengate on∙angkuja ine ua aganangaha. Ia Commission ko dilnagita dingtang dingtang gadangni dilgiparang jekai Chairperson ni biapo a∙dokni Home Minister, Chief Secretary, Home Secretary aro Director General of Police rangko a∙dok sorkari seoke a∙bachengatna nangengaha ine sing∙doanikoba dakangaha.
Batanggimin bilsirango a∙dok sorkari Pulis department ni kam ka∙anirangko namdapatna miksonge ia niam ko ra∙gatna chanchirimangaha. Unbaksana ramram manderangna dongimin niamrango pangchake kakket bichalrangko ra∙bana, neng∙nikani bidingrango pulis dolrangna u∙iatani aro uamangni kosako ka∙namgija niamni a∙palo pulisrangni chanchichipe rim∙chipanirangko champengnagitan ia Act ko tariangahachim ineba Marak agandapangaha.
Mikkangchi indakgipa obosta aro a∙selrangko manderang chagrongna nangjachina gita a∙dokni Governor ko iani bidingo sorkari baksa chanchirime ru·utgija somoini gisepo ia Accountability Commission ko a∙bachengate on∙china Marak mol∙molangaha.
