Salgnina ong·nasienggipa District Level Youth Exchange Programme 2023 ko Tura ni District Auditorium o a·jani chatro chatrirang aro chadamberangna da·al salni bako oprake on·angaha. Tom·aniona West Garo Hills a·jani Additional Deputy Commissioner aro MCS Winje Rosalie G. Momin mongsonggipa sokgipa ong·e bakko ra·angan baksana chadamberangna nambegipa ku·pattianirangko on·angaha. Apsan daken programme ko ong·atenggipa WGH District Sports Office-ni DSO Saljagring M. Marak tom·aniona re·bagipa skigiparang aro chadambe sakantikon gisik nange bakrimanina mittelpilan baksa rimchaksoani kattarangkoba aganangaha.
WGH a·jani adita skul aro collegerang jekai Government Boy’s Higher Secondary School, Tura Government College, Monfort Center Tura, Tura United Christian Academy, Don Bosco Higher Secondary School Tura, Aeroville Higher Secondary School, PASF Abong Noga College ni chatro chatrirang ia programme o bakko ra·angenga. Salgnina ong·nasienggipa programme o chadamberangna adita susaanirangko jekai quiz, extempore speech aro noksa salsusaanirangkoba ong·atanggen ine parakataha.
Ia programme o nambate dakgipa aro susaanirango chegiparangoniko sak 50 chatro chatrirangko seoke Shillong songjinmao Youth Programme o WGH a·jani palo bakko ra·na cholko man·anggen ine u·iataha. Unbaksana Shillongo nambate dakgiparangko a·songnigita ong·atgipa gadango bakko ra·na seokanikoba dakanggen ine u·iatangaha.
