Skulo rang∙gitik a·sel ong·ani somoirango dakna nanggipa sanna bannani cholrangko skulni skigiparangna talate on∙a miksonge salgittamna Capital Building Program ko October 4 tarikoni Tura, Dakopgre SMELC-o a∙bachengataha. Ia programko WGH a·jani District Administration ni Planning Department ong∙atangenga jeon dingtang dingtang a∙sel ong∙anirang jekai sal ding∙ana gitdilani, rangsitanio neng∙nikani aro gipin a∙sel ong∙an somoio bi∙sarangko naljokatna sanna bannani cholrangko skie on∙anggen. Ia programo bak ra∙enggipa skigiparangna dingtang mancha bi∙sani bewalni gimin talbate ra∙na, uamangni chanchianiko u∙ina aro nambate nirokaniko nanggipa bi∙sarangko jakkalani niamrangni bidingo ma∙siate on∙anggen.
Ia salgittamni programko ‘deal beyond the children’s needs’ katta bichongko done chatro chatrirangna lekkani gita skie ra·anikosan on·aigija skulo rang∙gitik a·sel ong·ani somoio skigiparang sanna bannanio jakdangdikna sapgiparang ong∙naba dakchakgen ine WGH a·jani ADC aro District Planning Officer Winje R G. Momin talate on·angaha. Ia programo salgittamna Senior Medical aro Health Officer Dr. Gandira Ch. Marak skulo rang∙gitik a∙sel ong·anio samrangko jakkalani bidingo skie on·aniko dakanggen, Sister Packia Mary dingtang mancha nitee simsakna nanggipa bi∙sarangko nirokani bidingo talatanggen aro Clinical Psychologist Narbecca Momin til∙ek an∙chaani bidingo aro bi∙sarangni chanchianiko ma∙sianiko agantale on∙anggen.
