India a∙songni chubatgipa gadango ong∙enggipa football club rangoni Hyderabad FC dolo kal·nagita A∙chik chadamberangoni sakgni Donkam M. Marak aro Bipush G. Marak seokako man∙angaha. Uamang batanggimin salrango Meghalaya Football dolo kal∙na cholko man∙giparangoni sakgni ong∙a. Donkam M. Marak, Tura songjinmani mingsinggipa Chandmari Football Club ni gitcham kal∙gipaba ong∙a. Da∙alo uamang sakgni an∙tangtangni changa sapaniko jakkale ia dal∙begipa chu∙sokaniko man∙anina sakantian uamangna nambegipa skaniko on∙atenga.
Meghalayani mingsinggipa club rangna kal∙e aro Meghalaya Football dolna kal∙na cholko man∙e uamang da∙o Hyderabad FC na kal∙na seokako man∙angskaaha. Hyderabad FC da∙o dipet India ni mingsinggipa football tournament Indian Super League (ISL) o bak ra∙e susaaniko dakenga. Uamangni chu∙sokanina sakantian nama ku∙pattianiko on∙atani bako Williamnagar a∙jani MLA aro Cabinet Minister Marcuise Marakba uni nama skaniko social media o parakataniko nikangaha. Uamang sakgnini seoka man∙anichi A∙chik jatna mikkim rasongko ra∙baani ong∙a aro chadambe skarangko didianiba ong∙a.
