Mendipathar Salpara-o ong∙atanggipa Meghalaya Cricket Association (MCA) ni U-19 me∙asa dolrangni Inter District Cricket Tournament kal·anio Tura District Cricket Association (TDCA) wicket 6 chi East Garo Hills District Cricket Association (EGHDCA) ko amataha.
EGHDCA bisil godoanio chegipa ong∙e dokchengna tik ka∙e over 32 o chu∙gimik wicketrangko ga∙akate 89 run rangko tariaha. EGH ni run tarigiminko rikanio TDCA over 10.1 ko gitchaate sak 4 wicket rangko ga∙akate cheangaha. Robol gogiparangoni Chandra Thapa over 8 goanio sak gittam wicket rangko ra∙angaha jeon EGH ni nambate dokgipa Thanun N. Marak (20 run) ko wicket ra∙angnagita man∙aha. Una agreba EGH DCA ni name dokanggipa Lensbirth N. Marak 16 run rangko man∙e Ben Hader N. Marak ni jako wicketko ga∙akatskaaha. Unbaksana Yash Mishra ba over 3 o sak 2 wicket rangko ra∙angnagita man∙aha.
EGH DCA ni tarigimin run rangko TDCA chu∙gimik over 40 na kal∙na nanggija over 29.5 ong·engpition nengrae chenagita man∙aha. TDCA na Shahin Alom 43 ball o 42 run ko man∙e, 4 changni aro 6 changbri ko dokangaha jekon Gulgul Sangma wicket ra∙angskaaha.
Ia bon·kamgipa kal∙susaanio MCA ni senior member rang aro District Association ni official rang dongpae Tura DCA na Champions trophy ko MCA ni President Naba Bhattacharjee ni jakchi on∙aniko dakangaha. Unbaksana Runners-up trophy ko EGH DCA na MCA ni Joint Secretary Chiang D. Shira ni jakchi on∙angskaaha.
