Swaach Bharat Abhiyan antiko manianio adita picnic cha∙ram biaprangko rongtale rakkinagita mijal salni bako namgipa ja∙kurangko de∙aniko dakangaha. Ia rongtal an∙talataniko daknagita Tourism department Tura ICFAI University baksa nangrime Ganol Aloe vera aro Chibrage jolni dingtang dingtang biaprangko rongtalatangaha.
Ia namgipa kamrangko West aro South West Garo Hills a∙jani Tourist Officer Ava Shereen O. Sangma, Tura ICFAI University ni Assistant Professor Bryan Boon R. Marak aro Ellerie N Arengh ni dilanichi chu·sokatna man·aha. Uamangni dakdilanichi picnic cha∙ronggipa damgni biaprangko chatro chatrirang, songni manderang aro Nokma rang baksa rongtal an∙talataniko dakangaha. Unbaksana Chibra Ganol eco-tourism society aro home stay rangko chalaigiparangba gisik nangbee bakko ra∙angtokaha.
Wilwilao donggipa biaprangko rongtal an∙tale rakkinagita an∙tangtangan daito ra∙china chatro chatrirang aro pilak bakko ra∙gipa manderangna Tourist Officer Ava Shereen O. Sangma didianiko on∙angan baksana antiprako konta gni mangni somoirangko on∙e indakgipa kamrangko ka·e mikkangchiba rongtale rakkiangkuchina didiangaha.
