Congress ni dilgipa Deborah Marak uni party nigita una susana cholko on·genchimode Tura Lok Sabha ni biapo chenagita namen ka·dongsoenga ine parakataha. 2024 Tura Lok Sabha ni biapo cheani cholrangni gimin kobor ra·timgiparangni sing·aniko dakon, ku·cholsan ong·e rakbate kam ka·genchimode ia chango susaanio chenagita nambegipa cholrang gnang ine Marak aganangaha. Batanggimin Lok Sabha election o Tura ni MP Agatha K Sangma baksa susaaniko dakanganioba ua gipin susagiparangna bate bang·bata vote rangko man·angaha indiba uni ja·mano ua susaaniko dakangtaijaha ine Marak agandapangaha.
NPP ni bil gnangani aro tangka paisanigita chu·onganiko nigrike chena ka·dongsoaniko aganon, tangka paisachiba pangnande kam ong∙rongja ine Marak aganangskaaha. Politics namen apalbeani gimin somoi baksa dingtanganirang dongaia aro party nigita noksik nokbakrangona re·ange manderang baksa ku·monganiko on·anichisa chenagita ama ine Marak aganangaha.
