Da·al salni bako Tura ni Aeroville Higher Secondary School ko a·bachengaoni bilsi 30 gapaniko District Auditorium o manianiko dakangaha. Tom·aniona Tura Municipal Board-ni Executive Chief Officer Rikse R. Marak mongsonggipa sokgipa ong·e bakko ra·angaha. Sokbagipa pilak ma·a paa aro chatro chatrirangko rimchaksoa gnang skul ni Principal Sane C B. Sangma program ko a·bachengdilangaha.
Programko ong·atani somoio Aeroville Secondary School ko a·bachengdilgipa Dr. Viola Sonachi B. Sangma maikai uni madrangrang baksa ku·mong nangrime 1993 bilsio a·bachengbaani itihasrangko aganangaha. A·bachengani bilsirango ia skulo nursery-oni primary-onasan dongaigenchimoba skulko chalaigipa aro skigiparangni bimchipe jotton ka·e kam ka·anichi ia somoio nambegipa gadangona sokan baksana Garo Hills a·jao skulrangoni ge·sa mingsinggipa ong·aha ine Dr. Viola aganangaha.
Skulni bilsi 30 ong·aniko maniangengon Principal an·tangni kusi ong·aniko janape skulni chatro chatrirang aro ma·gipa pagiparangko mittelpilangaha. Unbaksana skulni chatro chatrirang jemangan a·dokni gadango dingtang dingtang kal·susaanirango bakko ra·e chegiparangna skulnigita boksisrangko on·angjolaha.
Aeroville skulo class 11, 12 Arts aro Commerce stream ko mangmang skie ra·na cholko on·aigija, mikkangchi Science stream koba a·bachengatna miksongangenga ine Ku·rongdikni kobor ra·timgipana parakataha.
