A∙dok sorkari Meghalaya Energy Corporation Ltd (MeECL) na uamangni neng∙nikanirangko naljokatna japrako gong crore 40 rangko on∙enga ine Power Minister AT Mondal parakangaha. Ia crore 40 tangkarangko MeECL o kam ka∙enggiparangna dormaha, pension, office ko nirokna aro dingtang dingtang nanganirangna jakkalanggen ine Mondal janapangaha.
A∙doko bijolioniko man∙enggipa tangkarang gong crore 80 mangsan ong∙aia jekon ia tangkarangming changgni koros ong∙na apsanange bijoli breanio bon∙enga ine Power Minister parakangaha. MeECL o kam ka∙giparangna dormaha gamna nangani gong crore 24 mang ong∙enga aro pension cha∙giparangna crore 12 mang gamna nangenga ine u∙ina man∙angaha. Meghalaya sorkari MeECL o kam ka·enggiparangna dormaharangko somoi gita sokatna ja·kurangko rake ga·enga ine Mondal agandapangaha.
Batanggimin changoba MeECL na uamangni grorangko gamna Atmanirbhar Bharat Abhiyan scheme oniko loan ra·e dakchakanirangko on·angaha.
