North Garo Hills a∙jani Bajengdoba, Gokulgre songo te∙rikni gamchatani bidingo aro biteoniko tarigipa bosturangko bading chiwalaniko tang∙doatna miksonge Banana fest ko ong∙atangaha. Ministry of Food Processing Industries (MFPI) ni PMFME scheme ni ning∙o One District One Product (ODOP) nigita NGH a∙ja te∙rikko bading chiwalanio mongsonggipa bite ine ra∙chakaha aro a∙songni gipin a∙dokrangona mongsongbate Assam a∙dokna badinganio chu∙sokgipa ong∙aha. Ia scheme ko jakkale jolni mongsonggipa biteko bading chiwalna aro biteoni dingtang dingtang bosturangko tarianiko apalbatatna manderangna ra∙bae on·aha.
Ia programo dingtang dingtang rokomni te∙rik mingimin aro gittang biteoniko tarigipa cha∙anirang jekai chips, ruti, rutio nongani, cake aro gipin cha∙ani bosturangko mesokangaha. Una agreba jaktangchi tarigipa bosturang aro sika koanirangkoba mesokangjolaha. Ia programo te∙rikoniko cha∙ani tarianiko namdapatani, chapa ka∙ani aro bading chiwalaniko namdapatna skie on∙angaha. Ge∙e game cha∙aniko baridapate tang∙doatani aro te∙rikko ge∙e janggi tangani cholrangni bidingoba agantalate on·angaha.
Ia programko POSHAN Abhiyan ni ning∙o ong∙gipa POSHAN Maah programkoba gisik ra∙a gnang be∙enna namgniko on∙gipa cha∙anirangni gamchatani, an∙o donggiparangna namgniko on∙ani, sok bitchiko kanenggipa ma∙giparang, bakgitchak aro chadamberangna mikrakatani gita ong∙atangjolaha. Ia programko District Administration, Program Officer, District Medical & Health department, Horticulture department, ICDS, MBMA bakrime ong∙atangaha. Programo, Senior Medical & Health Officer, Dr. A M. Sangma, DSWO Jakrim Momin aro MBDA ni Asst. General Manager Nitul Das dongpae agantalate on∙angaha.
