East Garo Hills a∙jani District Swachh Bharat Mission Gramin nigita Swachhata Hi Seva Marathon Run-2023 ko re∙baenggipa September 30 tariko ong∙atna tik ka∙angaha. Ia katsusaaniko pring 6:30 oni Rongrenggre kal∙chakramoni katchakate Rongrenggre Baiza ona katange a∙bachengatgipa biapona katbapilaniko dake matchotatgen.
Ia katsusaanio East Garo Hills a∙jao songdonggiparangoni me∙a aro me∙chik bi∙sa bilsi chi∙gni oni bilsi chi∙chetona ong∙gipa chadamberang bak ra∙na gita man∙gen ine u∙iataniko on∙angaha. Ia katsusaanio bak ra∙e chegiparangna boksisrangkoba on∙angani donggen.
Ia katanio bak ra∙na gita September 29 tariko pring 11 bajioni attam 3 bajiona biming segatanirangko dakanggen. Ia Marathon Run 2023 ko dingtang mancha rongtal an∙tale dongani bidingo mikrakataniko on∙agita ong∙atenga.
