Garo Hills ni a∙jarango dengue sabisi batroroenga ine jangenggipani bidingo West Garo Hills, Tura Civil Hospital ni MD, Clinical Microbiologist Dr. Elim K. Marak agantalate on∙angaha. Manderangni dengue sabisi bilongen batroroenga ine gipatenggipa kattara kakket ong∙ja aro ia sabisiko man∙ani re·anggipa bilsiko toatgenchim ong∙ode ia bilsi namen komia ine Dr. Elim Marak Ku∙rongdik koborna parakangaha.
Dengue sabisiko “Aedes aegypti” jatsa gangguni chikachi batrorogipa ong∙a. Ia ganggu malaria sabisiko man∙atgipagita apsandaken walo chikgija salosa chikskaa aro dikdiksani gisepon bang∙a manderangona on∙tiprak chike sabisiko gipatna man∙a ine Dr. Elim aganangaha. Ia sabisiko gnigipa changna man∙gipa mande be∙ennigita bilongbate sae bilgrianiko man∙rongbata.
Garo Hills o ia sabisi skangonin donga jekon batanggipa somoirango sabisiko porikka ra∙na gita bosturang chu∙ongja ine Doctor aganangaha. Da∙omangba ia sabisiko porikka ra∙nagita jakkalgipa ELISA machine Garo Hills gimiko Tura Civil Hospitalosan dongkuenga ine ua u·iatangaha. Garo Hills ni bang∙a biaprangoni Rapid Diagnostic Kit-o porikka ra∙ani ja·manosa an∙chini bakrangko Tura Civil Hospital ona nambate porikka ra∙e nina watatenga. Dingtang dingtang biaprangoni watatenggipa an∙chini bakrangko chimongesa ELISA machine o porikka ra∙na nangenga. ELISHA-o porikka ra∙nagita jakkalgipa samrangko ma∙mong sorkari ICMR-National Instiute of Virology (NIV), Pune onisa watatenga aro porikkako ra∙na gita komibeoba sakdokni an∙chirangko nanga, ong∙jaode samrang nosto ong∙aona soka ine doctor u·iataha.
Uamangona sokbagipa an∙chinni bakrangko porikka ra∙ani ja∙manosa report ko health department na watataniko dakangskaa. Ia watatgimin report rangko a∙dokni health department man·soani ja∙mano sabisiko man∙gipa bang∙enga ong∙ode champengsona aro mikrakatna nanganirangko parakatronga.
Dengue sabisiko champengnagita an∙ching man∙a dipet jak ro∙gipa cholarang ba be∙enko chu∙onga gita pindapgipa ba·rarangko ganna nanga aro ganggu chikaniko champenggipa samrangko nongna nanga. Unbaksana noksam nokgilo mikka bitchirang sikonge donggipa bostu gitchamrangko nosto ka∙e galna nanga ine Dr. Elim K. Marak Ku∙rongdikna parakataha.
