Chief Minister Conrad Sangma a·dokni manderangna dal·bea dakchakaniko on·a, CM-ELEVATE Programko Vivanta, Shillong o mijal salni bako oprake on·angaha. Ia promgramko ra∙baanichi janggi tangna biltang jaktangchi dake cha·na man·agita aro mikkangchi Meghalaya a·dokni chadamberangni chu·gimik namgnina dakchakaniko on·anggen ine Conrad Sangma parakataha.
CM-ELEVATE Program ko a·bachengataniara bakrime kam ka·nagita, kamrangko nakatatna aro a·dokni chadamberangna dake cha·ani cholrangko ra·bae on·anggen jedakode bading chiwale cha·na gisiko nanggiparangni nangnikaniko chu·sokatnagita man·gen ine Chief Minister janape aganangaha. Ia program ni ning·o re·baenggipa bilsi gittamni gisepo sak hajal 20 mangna batpile dingtang dingtang a·bao bading chiwale cha·na cholrangko on·anggen jeon crore 300 mang ong·nasipile tangka paisarangko chamatmanaha ineba ua aganangaha.
Bading chiwale cha·na gisik nanggipa chadamberangna kamko a·bachengna nengrae tangkarangko ra·sona man·agita, public aro private sector bank rang bakrime 35 oni 75 percent mangni gita tangka paisako dakchakanggen ine Sangma u·iatangaha. Ia oprakani program o Chief Minister mongsonggipa sokgipa ong·e unbaksa Cabinet Minister Ampareen Lyngdoh, Paul Lyngdoh, A L Hek, adita Minister rang aro dal·dalgipa manderang dongpae bakko ra·angaha.
